រាជធានីភ្នំពេញ៖ ផ្សារទំនើបឡាក់គី (Lucky Supermarket) បានចាប់ដៃគូសហការជាមួយស្ថានទូតអូស្ត្រាលីប្រចាំព្រះរាជាណាចក្រកម្ពុជា ដើម្បីបើកសម្ពោធយុទ្ធនាការ «Taste of Australia 2026» ដោយនាំមកជូននូវផលិតផលគុណភាពខ្ពស់ដ៏សម្បូរបែបពីប្រទេសអូស្ត្រាលី ជូនដល់អតិថិជននៅតាមបណ្តាសាខាផ្សារទំនើបឡាក់គី ចំនួន ១០ ទីតាំង ចាប់ពីថ្ងៃទី២៦ ខែមិថុនា រហូតដល់ថ្ងៃទី២៥ ខែកក្កដា ឆ្នាំ២០២៦។

យុទ្ធនាការនេះ បង្ហាញឱ្យឃើញកាន់តែច្បាស់ពីកេរ្តិ៍ឈ្មោះល្បីល្បាញរបស់ប្រទេសអូស្ត្រាលី ក្នុងការផលិតអាហារ និងភេសជ្ជៈដែលមានគុណភាពខ្ពស់ មានសុវត្ថិភាព និងប្រកបដោយនិរន្តរភាព ព្រមទាំងផ្តល់ឱកាសឱ្យអ្នកប្រើប្រាស់នៅក្នុងប្រទេសកម្ពុជា អាចស្វែងរកទិញផលិតផលសុទ្ធសឹងជាម៉ាកល្បីៗ និងពិតប្រាកដរបស់អូស្ត្រាលីបានកាន់តែងាយស្រួល រួមមាន ផលិតផលទឹកដោះគោស្រស់Meadows សាច់គោអូស្រ្តាលីម៉ាកStanbroke គ្រឿងទេសភេសជ្ជៈ និងទំនិញប្រើប្រាស់ប្រចាំថ្ងៃជាច្រើនមុខទៀត។

កម្មវិធីប្រូម៉ូសិននៅតាមហាងនេះ ត្រូវបានរៀបចំឡើងដើម្បីគាំទ្រដល់គំនិតផ្តួចផ្តើមប្រចាំឆ្នាំ «Taste of Australia» របស់ស្ថានទូតអូស្ត្រាលី ដែលជាការបង្ហាញពីឧស្សាហកម្មអាហារ និងភេសជ្ជៈលំដាប់ខ្ពស់របស់អូស្ត្រាលី ព្រមទាំងឆ្លុះបញ្ចាំងពីទំនាក់ទំនងពាណិជ្ជកម្មដ៏រឹងមាំរវាងប្រទេសអូស្ត្រាលី និងកម្ពុជា។

នៅក្នុងពិធីបើកសម្ពោធយុទ្ធនាការនេះ ឯកឧត្តម ដេរិក យីប (Derek Yip) ឯកអគ្គរាជទូតអូស្ត្រាលីប្រចាំព្រះរាជាណាចក្រកម្ពុជា បានមានប្រសាសន៍ថា៖

«យុទ្ធនាការ Taste of Australia គឺជានិមិត្តរូបនៃការចែករំលែកនូវភាពសម្បូរបែប និងកម្រិតស្តង់ដារខ្ពស់នៃកសិផលអូស្ត្រាលី ជូនដល់មិត្តភក្តិរបស់យើងនៅក្នុងប្រទេសកម្ពុជា។ ចាប់តាំងពីកសិដ្ឋាន ការនេសាទ រហូតដល់ចម្ការទំពាំងបាយជូរ និងក្រុមអ្នកផលិតដោយសិប្បកម្ម ផលិតផលរបស់អូស្ត្រាលីត្រូវបានទទួលស្គាល់ជាសកល ទាំងលើផ្នែកគុណភាព សុវត្ថិភាព និងការផលិតប្រកបដោយនិរន្តរភាព។កម្ពុជានាំចូលផលិតផលកសិកម្ម និងអាហារពីប្រទេសអូស្ត្រាលី ក្នុងទំហំទឹកប្រាក់ប្រមាណ ១០០ លានដុល្លារអូស្ត្រាលីជារៀងរាល់ឆ្នាំ ដែលនេះស្តែងឱ្យឃើញពីតម្រូវការដ៏ខ្លាំងក្លាចំពោះផលិតផលរបស់អូស្ត្រាលី»។

តាមរយៈកិច្ចសហប្រតិបត្តិការនេះ ផ្សារទំនើប ឡាក់គី នៅតែបន្តពង្រីកការនាំចូលផលិតផលអន្តរជាតិដែលមានគុណភាពខ្ពស់ ដើម្បីផ្តល់ជូនអតិថិជននូវជម្រើសកាន់តែសម្បូរបែប និងភាពងាយស្រួលក្នុងការទិញទំនិញពីបណ្តាម៉ាកផលិតផលល្បីៗដែលគួរឱ្យទុកចិត្តរបស់ប្រទេសអូស្ត្រាលី។

សូមបញ្ជាក់ថា យុទ្ធនាការ «Taste of Australia» នឹងប្រព្រឹត្តទៅចាប់ពីថ្ងៃទី២៦ ខែមិថុនា ដល់ថ្ងៃទី២៥ ខែកក្កដា ឆ្នាំ២០២៦ ដោយមានការដាក់លក់ផលិតផលអូស្ត្រាលីយ៉ាងច្រើន រួមជាមួយកម្មវិធីប្រូម៉ូសិនពិសេសៗនៅតាមបណ្តាសាខាផ្សារទំនើប ឡាក់គី ដែលបានជ្រើសរើស។