នៅក្រុមហ៊ុន ឌី អេហ្វ អាយ ឡាក់គីចីរភាពចាប់ផ្តើមពីរបៀបដែលយើងធ្វើប្រតិបត្តិការ។ ក្នុងនាមជាក្រុមហ៊ុនលក់រាយផ្សារទំនើបឈានមុខគេមួយនៅកម្ពុជា ក្រុមហ៊ុននៅតែបន្តវិនិយោគលើគំនិតផ្តួចផ្តើមជាក់ស្តែង ដែលជួយធ្វើឱ្យប្រសើរឡើងនូវប្រសិទ្ធភាពប្រតិបត្តិការ ស្របពេលជាមួយគ្នាកំពុងកាត់បន្ថយផលប៉ះពាល់បរិស្ថាននៅទូទាំងបណ្តាញហាង និងការចែកចាយរបស់ខ្លួន។

ក្នុងរយៈពេលប៉ុន្មានឆ្នាំចុងក្រោយនេះ ឌី អេហ្វ អាយ ឡាក់គី បានអនុវត្តនូវគំនិតផ្តួចផ្តើមសន្សំសំចៃថាមពល និងការកែលម្អប្រតិបត្តិការជាច្រើន ដែលត្រូវបានរចនាឡើងដើម្បីគាំទ្រដល់គោលដៅចីរភាពរយៈពេលវែង។ កិច្ចខិតខំប្រឹងប្រែងទាំងនេះរួមមាន កម្មវិធីបង្កើនប្រសិទ្ធភាពថាមពល ការធ្វើឱ្យប្រសើរឡើងនូវប្រសិទ្ធភាពប្រព័ន្ធត្រជាក់ បច្ចេកវិទ្យាប្រព័ន្ធត្រជាក់ Waterloop និងការដំឡើងទ្វារទូក្លាសេ (chiller doors) នៅក្នុងហាងដើម្បីកាត់បន្ថយការប្រើប្រាស់ថាមពល។

ចាប់តាំងពីឆ្នាំ ២០២៤ មក គំនិតផ្តួចផ្តើមទាំងនេះបានចូលរួមចំណែកកាត់បន្ថយការប្រើប្រាស់ថាមពលច្រើនជាង ៨០០,០០០ គីឡូវ៉ាត់ម៉ោង ជារៀងរាល់ឆ្នាំ។ ការដំឡើងទ្វារទូក្លាសេលើប្រព័ន្ធត្រជាក់ជាង ២០០ ក៏បានផ្តល់នូវការសន្សំសំចៃថាមពលរហូតដល់ ៤៤% ដែលជួយកាត់បន្ថយផលប៉ះពាល់ប្រតិបត្តិការ ខណៈពេលរក្សាបាននូវបទពិសោធន៍នៃការទិញទំនិញប្រកបដោយគុណភាពសម្រាប់អតិថិជន។

លើសពីនេះ ឌី អេហ្វ អាយ ឡាក់គី បន្តស្វែងរកដំណោះស្រាយភស្តុភារ (logistics) ដែលមានចីរភាពបន្ថែមទៀត រួមទាំងគំនិតផ្តួចផ្តើមប្រើប្រាស់យានយន្តអគ្គិសនី និងការកែលម្អប្រតិបត្តិការផ្សេងទៀត ដែលគាំទ្រដល់ការអនុវត្តអាជីវកម្មប្រកបដោយការទទួលខុសត្រូវនៅទូទាំងខ្សែសង្វាក់ផ្គត់ផ្គង់។

អ្នកនាំពាក្យរបស់ ឌី អេហ្វ អាយ ឡាក់គី បានមានប្រសាសន៍ថា៖ "ចីរភាពសម្រាប់យើង ចាប់ផ្តើមពីរបៀបដែលយើងធ្វើប្រតិបត្តិការ មិនមែនត្រឹមតែជារបៀបដែលយើងនិយាយនោះទេ។ រាល់ការកែលម្អ ទោះបីជានៅក្នុងហាង ប្រព័ន្ធត្រជាក់ មជ្ឈមណ្ឌលចែកចាយ ឬប្រតិបត្តិការភស្តុភាររបស់យើងក៏ដោយ គឺសុទ្ធតែរួមចំណែកដល់ការកសាងអាជីវកម្មដែលប្រកបដោយការទទួលខុសត្រូវខ្ពស់សម្រាប់អតិថិជន សហគមន៍ និងមនុស្សជំនាន់ក្រោយរបស់យើង។"

គំនិតផ្តួចផ្តើមទាំងនេះ គឺជាផ្នែកមួយនៃដំណើរឆ្ពោះទៅរកចីរភាពដ៏ទូលំទូលាយរបស់ ឌី អេហ្វ អាយ ឡាក់គី ដែលផ្តោតលើប្រតិបត្តិការប្រកបដោយការទទួលខុសត្រូវ ការកាត់បន្ថយកាកសំណល់ ការគាំទ្រសហគមន៍ និងការចូលរួមចំណែកដល់ការថែរក្សាបរិស្ថាននៅទូទាំងប្រទេសកម្ពុជា។

ស្របពេលដែលក្រុមហ៊ុនកំពុងបន្តរីកចម្រើន DFI Lucky នៅតែបន្តប្តេជ្ញាចិត្តយ៉ាងមុតមាំក្នុងការបង្កើតតម្លៃរយៈពេលវែង តាមរយៈការអនុវត្តអាជីវកម្មប្រកបដោយការទទួលខុសត្រូវ ដែលជួយគាំទ្រទាំងមនុស្ស និងភពផែនដី។

ធ្វើក្នុងថ្ងៃនេះ សម្រាប់ថ្ងៃអនាគត។ (Doing Today, For Tomorrow.)